-Той спякотны чэрвень 1941-га запомніўся назаўсёды. Акупацыя для нас пачалася на каталіцкае свята Пятра і Паўла, якое выпадае на 29 чэрвеня. У той год гэта была нядзеля. Многія жыхары з раніцы апраналіся па-святочнаму, збіраліся ў храм. Свята, аднак, аказалася зусім не святочным... Ворагі паявіліся ў Вялікай Бераставіцы на матацыклах. Першыя месяцы акупанты паводзілі сябе больш-менш стрымана. Толькі на вуліцах і падворках рэзала слых чужая гаворка: "Матка-сала! Матка-яйкі!" А потым пачаліся рэпрэсіі. Ўсіх мясцовых яўрэяў сагналі ў гета, якое немцы арганізавалі ў будынках вакол сінагогі, у квадраце паміж вуліцамі (цяперашняя назва): Кастрычніцкая, Леніна, Савецкая, Рабочая. Мучалі голадам і здзекамі, а праз некаторы час вывезлі ў Крынкі і, напэўна, знішчалі.