Жыў ў вёсцы Дзешчанка звычайны сціплы чалавек, але біяграфія яго незвычайная: ветэран вайны, былы дырэктар школы, ветэран працы. Нарадзіўся Міхаіл Іосіфавіч у вёсцы Дзешчанка ў 1919 г. Спачатку вучыўся ў Азерскай, потым у Дзешчанскай школе. Пазней скончыў педагагічнае, а затым ваеннае вучылішча, і выйшаў адтуль у званні лейтэнанта. “Нас, маладых афіцэраў, адправілі на практыку ў Ваўкавыск у полк. Прыехалі мы туды позна і адразу леглі спать. А калі прачнуліся, то пачулі першыя выбухі гармат, першыя крокі вайны. Страшна не было, можа, таму што гэта былі толькі першыя дні і мы яшчэ не паспелі пабачыць жахі сапраўднай вайны. Наогул, усё адбывалася вельмі хутка і ў канцы чэрвеня немцы былі ўжо ў Мінску. Яны планавалі захапіць краіну за кароткі тэрмін, бо разумелі, што калі вайна зацягнецца, яны ніколі не атрымаюць перамогу.” Пачаў вайну Міхаіл Іосіфавіч на Беларусі, затым былі Усходняя Прусія, Польшча, а закончыў у Берліне. Перамогу Міхаіл Іосіфавіч сустрэў на рацэ Эльбе.