Ваяваў пехацінец Хілюта на 3-ім Беларускім. Баі ішлі цяжкія, асабліва за Кёнігсберг. І сёння да драбніц памятае ветэран 12 сакавіка-пачатак грандыёзнага наступлення нашых войскаў на гэты горад-крэпасць. "Дзве гадзіны вялася артпадрыхтоўка, - успамінае Міхаіл Пракопавіч. - Наступалі і ўдзень, і ўночы. Не да сну было, не да адпачынку. Мне ўвайсці ў Кёнігсберг не давялося:аднойчы пад ранак блізка разарваўся снарад. Многія загінулі і былі паранены. Мне раздрабіла абедзве нагі." Шпіталь у Туле, цяжкае лячэнне. І праз гады яшчэ выходзілі з нагі асколкі. Ужо потым ветэрана знайшлі медалі" За адвагу", ордэн Айчыннай вайны 2 ступені. Салдат вярнуўся з вайны хоць і паранены, але жывы.