У гады Вялікай Айчыннай вайны Пётр Іванавіч быў сувязным у атрадзе "Мсцівец" партызанскай брыгады "Разгром". Штодня, рызыкуючы жыццём, дастаўляў важную інфармацыю для партызан, даставаў соль і медыкаменты. Не раз даводзілася развітвацца з жыццём, але на дапамогу прыходзілі партызаны, як і ў той дзень, калі фашысты сагналі ў адзін будынак усіх жыхароў вёскі Кляннік, сярод якіх быў і Пётр Іванавіч са сваёй сям'ёй. Пасля вайны працаваў у МТС на малатарні, адначасова займаўся кавальскай справай, паставіў хату. Усё астатняе жыццё прайшло ў клопатах і руплівай працы. У 1990 годзе Пятра Іванавіча не стала, а ён і сёння для нас, яго нашчадкаў, застаецца ўзорам мужнасці, працавітасці, чалавечай годнасці. Перад яго светлай памяццю, веліччу жыццёвага подзвігу мы, нашчадкі, усведамляем і сваю адказнасць за мір і спакой на роднай зямлі.