Доўгi шлях вайны прайшоў Зубцоў Аляксандр Мiкалаевiч, прызваны ў рады Чырвонай Армii ў 1937 г. У 1939 г. ён прымаў удзел у далучэннi Заходняй Беларусi да БССР. Затым яго часць была перакiнута ў Ленiнградскую ваенную акругу i зiмой 1940 г. ўдзельнiчала ў вайне з Фiнляндыяй. Ваяваў Зубцоў А. М. у Прыбалтыцы, служыў у саперным батальёне, двойчы быў паранены. Пасля лячэння працягваў удзельнiчаць у баях. Вызваляў гарады Шауляй, Беласток, дайшоў да Кёнiгсберга. Быў узнагароджаны медалём «За адвагу».